BAKPO Kumbe Male?

Mungkie ado pakat nnanyo bakpo kawe buh namo Kumbe Male. Sebenarnyo, kawe letok namo Kumbe Male tu ado sebak dio. Gini crito dio…

Oleh sebak umoh hok kawe dudok loni tu blake dio ado ghob skit jadinyo, banyok la nate-nate nga ibu-ibu hok ado situ. Daghi hok ssayap sapa la hok hidup melato.Ado belako. Kawe ni kalu nok wak so-so kijo biasonyo kawe buak male terutama kalu bak hok ado sabik denge nnulih. Tok caro la nnulih gapo, surat ko, rekod ngaja ko, taip blog ko, cetting ko, de banyok lagi serbo makniko hok berkaite denge kijo nnulih ni samo ado nulih tange ataupon nnaik denge kopiuto.

Balik pado persoale hok mulo-mulo takdi, bakpo kawe letok namo Kumbe Male, biasonyo kalu kawe duk nnulih tengoh male tu, kawe sokmo buko nnelo. Yo la, suruh angin masuk, sejuk sikit. Baghu ado semangat nok nnulih. Sambil-sambil nnulih tu, laye lagu-lagu sikit. Tok kiro la lagu nasek ko, rok kapok ko, bulih blako, jadi teme kawe tiko tu. Oleh sebak kawe buko nnelo, mako banyok ibu hok masuk dale bilik kawe tu. Hok paling banyok skali ialah Kumbe la. Bulih kato tiak-tiak male, ado sokmo dio, masuk neme kawe. Ado la dale pak limo eko smalame. Sebak tu la kawe letok namo Kumbe Male sebak maso kawe nnulih tu dio ado sokmo chokooh dok neme kawe tengok kawe nulih. Lepah dio letih dudok gak, dio terbe dale bilik kawe tu. Ngggg nguuuu…..Lebih kure bunyi dio…Ok jugok buak halwo telingo kalu takdok redio ko mp3 ko untok wak dengar.

Jadi gitu la sala silohnyo kawe paka namo Kumbe Male ni, sempeno namo Kumbe hok masuk bilek kawe sokmo waktu male dok nneme kawe nnulih. Tapi kalu nok tukar kok bahaso inggerih pon bulih jugok. Jadi makno Kumbe “jate” sebak “male” tu ke makno dio jate jadi tukar jadi Kumbe jate. Tapi bagi kawe male tu buke makno jate tapi bersempeno denge waktu male atau dale bahaso stendeknyo”malam”. Gitu la crito dio…Sehinggo jupo pulok nati dale corete kawe hok lain.Tenkiu.